У чэрвені аграгарадок Жодзішкі ў Смаргонскім раёне стане цэнтрам фестывальнага руху

28 чэрвеня бягучага года на маляўнічай жодзішкаўскай зямлі пад адкрытым небам адбудуцца два адметных мерапрыемствы, аб'яднаныя ідэяй аховы і папулярызацыі мясцовых традыцыйных выканальніцкіх мастацтваў. 

І гэта невыпадкова, бо ў Смаргонскім раёне захоўваюць адну з адметных музычна-інструментальных традыцый – «Смаргонскія найгрышы». Гэтая праява мясцовай традыцыйнай культуры ў 2021 г. атрымала статус гісторыка-культурнай каштоўнасці. 

28 чэрвеня ў 11:00  у былой сядзібе аграгарадка Жодзішкі распачнецца рэгіянальны фестываль народнай інструментальнай музыкі «Іграю, як знаю, скачу, як хачу». Тут загучаць старадаўнія мелодыі, а майстэрства музыкаў яшчэ раз нагадае пра багацце і разнастайнасць культурнай спадчыны Смаргоншчыны.

У 14:00 на пляцоўцы Жодзішкаўскага Дома культуры адбудзецца фестываль побытавых танцаў «Жодзішкаўскі карагод», дзе сустрэнуцца танцавальныя пары з розных куткоў Беларусі, каб сумеснымі намаганнямі захаваць і перадаць нашчадкам традыцыі побытавага танца.

Удзельнікаў і гасцей фестываляў чакаюць выступленні творчых калектываў, майстар-класы, конкурсы, выстаўка-продаж вырабаў народных майстроў.

Паводле ДУК «Смаргонскі раённы цэнтр культуры»