Будслаўскі фэст: традыцыя працягваецца

У першую пятніцу і суботу ліпеня у Мінскай вобласці праходзіць Будслаўскі фэст – штогадовыя ўрачыстасці у гонар абраза Божай Маці Будслаўскай, які больш за 400 гадоў знаходзіцца ў касцёле Унебаўзяцця Найсвяцейшай Панны Марыі ў аг. Будслаў. Гэта традыцыя мае статус гісторыка-культурнай каштоўнасці Рэспублікі Беларусь і ўнесена ў Рэпрэзентатыўны спіс нематэрыяльнай культурнай спадчыны чалавецтва ЮНЕСКА (2018 г.).

Сёлета святкаванні прайшлі з 2 па 4 ліпеня.

На фэсте прысутнічалі святары Рымска-каталіцкай і Грэка-каталіцкай (уніяцкай) цэркваў у Беларусі, Беларускай праваслаўнай царквы, прадстаўнікі іншых рэлігійных канфесій краіны.  У святочных мерапрыемствах таксама прынялі ўдзел прадстаўнікі дзяржаўных органаў кіравання, дыпламаты замежных амбасадаў у нашай краіне.

Вернікі дабіраюцца у Будслаў па чыгунцы, на аўтобусах, роварах і асабістым аўтатранспарце, а таксама сплаўляюцца на байдарках.

Найвялікшай павагай карыстаюцца пілігрымы, якія пешшу пераадолелі шлях да Будслава, каб ўшанаваць абраз Маці Божай. У гэтым годзе такіх было 2690 чалавек. Гэта жыхары Ліды, Смаргоні, Мінска, Баранавічаў, Жодзіна, Браслава, Вілейкі і іншых беларускіх гарадоў.

Традыцыю ўшанавання абраза Маці Божай Будслаўскай вернікі пераймаюць у сем'ях ці праз царкоўныя суполкі. На фэст часта прыязджаюць прадстаўнікі розных пакаленняў адной сям’і, што садзейнічае захаванню сувязей паміж імі.

Як і ў ранейшыя гады, у праграме свята былі сустрэчы паломнікаў са святарамі, Святыя Імшы, начная працэсія са свячамі, маладзёжнае малітоўнае чуванне, пакланенне найсвяцейшым дарам, гадзіны малітвы да Маці Божай і інш. 

Аб усіх падзеях Будслаўскага фэсту можна даведацца з рэпартажаў БелТА, партала Каталіцкага Касцёла ў Беларусі Catholic.by.

Выкарыстаны фота В. Ведзеня, Catholic.by